A Mancomunidade de Municipios da Comarca de Verín recibe 168.694,50 € da Xunta de Galicia e do FEDER para mellorar a xestión dos residuos municipais

Ampliar

×

Verín, 23 de outubro de 2026. A Mancomunidade de Municipios da Comarca de Verín resultou beneficiaria de dúas axudas da Consellería de Medio Ambiente e Cambio Climático da Xunta de Galicia, convocadas pola Orde do 15 de xaneiro de 2026 para o financiamento de actuacións dirixidas a incrementar a ecoeficiencia na xestión dos residuos de competencia municipal (procedemento MT975X) e cofinanciadas nun 60 % pola Unión Europea no marco do programa Galicia FEDER 2021-2027. O importe total concedido ascende a 168.694,50 euros.

As actuacións subvencionadas

Liña 1 · Recollida separada de biorresiduos (exp. EELL-255-2026-RES): 18.694,50 €. Implantación e mellora da recollida separada dos biorresiduos (contedor marrón): subministración de contedores, caldeiros e bolsas compostables e campañas de sensibilización dirixidas ás familias e aos grandes xeradores (hostalaría, comercio e centros públicos), para que os restos de comida e de horta deixen de ir á fracción resto e se valoricen como compost.

Liña 2 · Vehículo para a recollida separada de biorresiduos (exp. EELL-255-2026-RES): 150.000,00 €. Adquisición dun vehículo específico para a recollida separada dos biorresiduos, que permitirá crear unha ruta diferenciada para esta fracción, garantir a súa trazabilidade e o seu transporte ata a instalación de tratamento para a súa valorización.

Obxectivo e resultado esperado

O obxectivo principal destas axudas é ampliar a capacidade de xestión de residuos municipais e o resultado que se pretende acadar é aumentar a cantidade de residuos que se recollen de xeito selectivo, en liña cos obxectivos do Plan de Xestión de Residuos Municipais de Galicia 2030 e da Lei 7/2022 de residuos e solos contaminados para unha economía circular.