A Mancomunidade de Verín presenta o novo servizo de recollida de biorresiduos para a hostalaría e o comercio

Verín, 28 de outubro de 2026. A Mancomunidade de Municipios da Comarca de Verín presenta o mércores 28 de outubro o novo servizo de recollida porta a porta de biorresiduos para os grandes xeradores de materia orgánica dos concellos de Cualedro, Laza e Monterrei.

Ampliar

×

Un novo vehículo e colectores de 360 litros

Na presentación mostrarase o novo vehículo de recollida de biorresiduos, os colectores marróns de 360 litros que recibirán os establecementos e o panel informativo da campaña «O residuo orgánico? Ao marrón!».

O territorio da Mancomunidade non contaba ata agora cun sistema de recollida separada do orgánico. Esta primeira fase dirixirase á hostalaría, aos supermercados e a outros establecementos que xeran grandes cantidades de restos de comida.

Como funcionará

Os grandes produtores recibirán un colector propio, que sacarán á rúa nos días e horarios acordados. Os medianos produtores, como a maior parte dos restaurantes, poderán depositar o orgánico nos colectores da vía pública, que tamén poderán usar as vivendas próximas.

Os biorresiduos recollidos trasladaranse a SOGAMA para o seu tratamento na planta de compostaxe.